TERTULIANOS POLITICOS OU POLITICOS TERTULIANOS

Os/as tertulianos/as son esa clase de xente que contribúe a facer peor unha sociedade. Agás excepcións. Sempre hai excepcións. E non polas ideas que transmiten, senón polo seu posicionamento fronte aos problemas que acaba contaxiándose á xente en xeral.

Calquera feito que se xulgue sempre ha ter aspectos positivos e negativos,vantaxes e inconvenientes. Sempre será posible criticalo ou defendelo. Mais a posición dos/as tertulianos e situarse a priori a favor ou en contra. A partires desta posición as análises só se centran nos aspectos bos ou nos aspectos malos.

Isto ten tres efectos moi negativos. En primeiro lugar nunca axuda a encontrar a posición máis axeita que sempre virá dunha análise ponderada de vantaxes e inconvenientes. En segundo lugar non contribúe a que as posturas sobre os feitos determinados se tomen sobre a análise dos mesmos, senón sobre actitudes tomadas previamente.

Pero sobre todo, fomenta esa actitude tan xeneralizara de criticar a quen toma decisións, pero non comprometerse a tomalas. Esa é a grande desgracia das tertulias. Fomentan a ausencia de compromiso, porque transmiten a idea de que a situación ideal consiste en deixar que outros/as tomen as decisións e despois quedar “satisfeitos” criticándoas ou deféndoas. Sempre haberá motivos para facelo. E mesmo parece que así contribúen ao debate. E chamanlle “opinión pública”. Manda truco....

Os/as tertulianos/as , eses/as que critican á “clase política” , son unha parte fundamental da mesma, coa súa propia e especifica función. E se cadra, non son o mellor da clase política ( con excepcións).

Mais aínda hai algo peor . Moitos/as dirixentes políticos , unha grande parte dos actuais partidos políticos, asumiron o papel de tertulianos/as. Primeiro miran de onde sae unha decisión. Si sae dos “seus”, buscaran os aspectos positivos para defendela. E só os positivos. Se non sae dos “seus”, buscaran os aspectos negativos, e só os negativos, para criticala. Mais ¿que farían eles se puideran tomar a decisión? Difícil, moi difícil, case imposible conseguir que o digan. E cando o din é baixo a premisa dunhas condicións case sempre virtuais e diferentes das que había cando as decisións se tomaron.